शब्दसंदेश न्यूज पाथरी (जि परभणी ): अर्ध्या तासापूर्वीच जन्मलेलं एक गोंडस बाळ सुसाट धावत्या ट्रॅव्हल्स बसमधून फेकून दिलेलं काळसर निळसर कपड्यात गुंडाळलेला जीव. काही मिनिटांतच मृत्युमुखी पडले... ही गोष्ट कुठल्याही काल्पनिक कथेतली नाही, तर पाथरी-परभणी महामार्गावर दोन दिवसांपूर्वी घडलेली वास्तवकथा आहे. 15 जुलैच्या पहाटे, पाथरी-सैलू रस्त्यालगत कॅनॉलच्या पुढे एक अर्भक धावत्या ट्रॅव्हल मधून रस्त्यावर फेकलं गेलं, याच ठिकाणाहून जाणाऱ्या काहींनी पाहिलं तेंव्हा ते मृत होते. प्राथमिक वैद्यकीय अहवालात डोक्यावरील गंभीर मारामुळे बाळाचा मृत्यू झाल्याचं स्पष्ट झालं. त्यामुळे हत्येचं प्रकरण असल्याचं समोर आलं आहे. दरम्यान या प्रकरणातील दोन्ही आरोपी विरुद्ध खुनाचा गुन्हा नोंद झाला असून एका आरोपीला पोलिसांनी अटक केली आहे.
कोण आहेत आरोपी
या प्रकरणात दोन आरोपी ऋतिका मिलिंद ढेरे आणि तिचा तथाकथित पती अल्ताफ मेहनुद्दीन शेख (रा. परभणी) – यांच्यावर सुरुवातीला पाथरी पोलीस ठाण्यात अर्भक विल्हेवाटीचा गुन्हा दाखल करण्यात आला होता. पण वैद्यकीय अहवाल, घटनास्थळ आधारे पोलिसांनी त्वरित भारतीय दंड विधान कलम 103 (1) (खून) अंतर्गत गुन्हा वाढवला. अल्ताफ शेखला पोलिसांनी पहिल्या दिवशी ताब्यात घेऊन चौकशी करून नोटीस वर सोडले. त्यानंतर दुसऱ्या दिवशी ताब्यात घेतलं आणि प्राथमिक मेडिकल रिपोर्टच्या आधारे चौकशीनंतर त्याला अटक केली आहे. पोलिसांनी मृत अर्भकाच्या डीएनए तपासणीसाठी रिपोर्ट पाठवला आहे. अर्भकाच्या मातृत्व-पितृत्वाचा वैज्ञानिक पुरावा लवकरच स्पष्ट होईल, अशी माहिती पोलीस सूत्रांकडून मिळाली. मृत अर्भक याची मेडिकल तपासणी आणि डी एन ए तपासणी करण्यात आल्या नंतर ते अंत्यसंस्कारासाठी मातेच्या ताब्यात देण्यात आले आहे. ती आता परभणी येथील रुग्णालयात उपचार घेत आहे.
