शब्दसंदेश न्यूज नेटवर्क,
देवरी ३० डिसेंबर २०२४
बीड जिल्ह्यातील सरपंच हत्या प्रकरण, धाराशिव जिल्ह्यातील सरपंचाला पेट्रोलने जिवंत जाळण्याच्या प्रयत्न यासह राज्यात सतत सरपंचावर होणारे जीव घेणे हल्ले अशा घटनांच्या निषेधार्थ गोंदिया जिल्ह्यातील सर्व ग्रामपंचायतचे कामकाज ३१ डिसेंबर ते २ जानेवारी दरम्यान तीन दिवस बंद ठेवून शासनाचे ध्यानाकर्षण करण्याच्या निर्णय गोंदिया जिल्हा सरपंच संघटनेने घेतला आहे.
बीड जिल्ह्यातील मस्साजोग या गावचे आदर्श माजी सरपंच ज्यांनी ग्रामपंचायतीला विकास कामाच्या संदर्भात अनेक पुरस्कार मिळवून दिले. गावाच्या विकास करण्यासाठी सातत्याने प्रयत्न केले. अशा सरपंचाचे अपहरण करून त्यांची हत्या करण्यात आली. ही घटना ताजी असतानाच पुन्हा सरपंचावरील जीव घेण्या हल्ल्याच्या दुसऱ्या घटनेने महाराष्ट्र हादरला. धाराशीव जिल्ह्यातील सरपंचाच्या कारची तोडफोड करून पेट्रोलने जिवंत जाळण्याचा प्रयत्न केल्याची धक्कादायक घटना समोर आली आहे. लोकशाही तथा पुरोगामी महाराष्ट्राच्या अस्मितेला गालबोट लावणाऱ्या अशा घटना तात्काळ थांबविल्या पाहिजेत. यासाठी सरपंच संघटना आक्रमक झाली आहे. राज्यात घटना घडणे हे अतिशय चिंताजनक असून सरपंचांनी गाव गाडा चालवायचा कसा? त्यांच्या सुरक्षितेची हमी घ्यायची कुणी? असे गंभीर प्रश्न पडू लागले आहेत. अशा घटना वर आळा घालण्यासाठी शासनाने कठोर पावले उचलावीत, सरपंच सुरक्षेसाठी कायदा करावा, हत्या प्रकरणातील आरोपींना तातडीने अटक करून त्या मागण्या मुख्य सूत्रधाराच्या शोध घेण्यात यावा. सरपंच तथा ग्रामपंचायत पदाधिकाऱ्यांना कायदेशीर संरक्षण देण्यात यावे. अशी सरपंच संघटनेची मागणी आहे. न्याय मागण्यासाठी तथा सरपंच हत्याप्रकरणाच्या निषेध करण्यासाठी दिनांक ३१ डिसेंबर ते २ जानेवारी दरम्यान गोंदिया जिल्ह्यातील ग्रामपंचायतीचे कामकाज बंद राहील अशी माहिती सरपंच संघटनेचे जिल्हाध्यक्ष चंद्रकुमार बहेकार, विदर्भ उपाध्यक्ष महेंद्र भांडारकर, सचिव हेमलता चव्हाण, महिला अध्यक्ष वर्षा पटले, उपाध्यक्ष मनीष गहेरवार यांनी दिला आहे.
