सर्व कारभाराची माहिती मिळणार एका क्लिकवर
शब्दसंदेश न्यूज गोंदिया, दि.०५: केंद्र व राज्य सरकारने ग्रामपंचायती अधिक बळकट करण्यावर भर दिल्याने आता ग्रा. प. च्या विकसासाठीही मोठ्या प्रमाणात निधी उपलब्ध होऊ लागला आहे. त्यामुळेच ग्रा. प. च्या कारभारात पारदर्शकता असावी व या सर्व कारभाराची माहिती ग्रामस्थांना एका क्लिकवर उपलब्ध व्हावी, यासाठी पंचायत राज मंत्रालयाने तंत्रज्ञानाचे एक पाऊल पुढे टाकत' मेरी पंचायत' हे अॅप आणले आहे. या अपमुळे गावाच्या कारभाराची सर्व माहिती प्रत्येक ग्रामस्थाला सहज पाहता येणार आहे.
डिजीटल युगात आता स्थानिक स्वराज्य संस्थाही मागे नाहीत हे मेरी पंचायत अॅपने दाखवून दिले आहे. ग्राम पंचायतींचा विकास झपाट्याने होऊ लागला असून केंद्र व राज्य सरकारकडून आता पंचायतींना थेट निधी मिळू लागला आहे. या निधीमुळे ग्रामीण प्रशासन गावातील कामे सहजरित्या पूर्ण करू शकत आहे.
सरकारकडून गावासाठी किती निधी उपलब्ध
झाला आहे, गावामध्ये सध्या कोण कोणत्या योजना सुरु आहेत, याची सर्व माहिती अॅपद्वारे मिळू शकेल. ग्रामस्थांना ही माहिती मिळविण्यासाठी ग्रा. प. मध्ये हेलपाटे घालावे लागणार नाहीत. केवळ माहितीच नाही तर अॅपच्या माध्यमान संपूर्ण ग्रामपंचायतींचा समाजिक व आर्थिक लेखाजोखा देखील तपासून पाहता येणे शक्य होणार आहे.
ग्रा.प. मधील संख्या, समित्यांची सदस्य माहिती, समित्यांचे अध्यक्ष, नोटीसबोर्ड, ग्रा. प. मिळणारे अनुदान याबरोबरच ग्रा. प. ची एकूण बैंक खाती किती आहेत, त्यामध्ये शिल्लक रक्कम व प्रत्येक कामासाठी खर्च झालेली रक्कम याशिवाय कामाची सद्यस्थिती, वेगवेगळी देयके, पाण्याचे स्त्रोत, नळजोडणी, पाणी तपासणी अशी सविस्तर माहिती प्रत्येक ग्रामस्थांना अॅपवर पाहता येणार आहे. त्यामुळे ग्रामपंचायतींच्या कारभाराची सर्व कुंडलीच ग्रामस्थांपूढे उघड होणार आहे. गावांच्या विकासावर भर देण्यासाठी सरकारकडून विविध उपक्रम राबविण्यात येत असून मेरी पंचायतमुळे कारभार अधिकाअधिक पारदर्शक होणार आहे.
अभिप्राय देण्याची सुविधा
ग्रामपंचायतींमध्ये जी कामे सुरु आहेत अथवा ज्या काही योजना आहेत त्यामध्ये त्रुटी असल्यास किंवा कामाचे कौतूक करावयाचे असल्यास त्याबाबतचे फोटोही अपलोड करता येणार आहेत. ग्रामपंचायतींमधील ग्रामस्थ २५० शब्दांमध्ये आपला चांगला किंवा वाईअ अभिप्राय देऊ शकतील. त्यामुळे प्रशासनाला देखील गावामध्ये काय सुरु आहे, याची माहिती मिळू शकेल.
